KORONADAL CITY – Padayon sa gihapon ang pagsaulog sang mga kautoran naton nga Muslim sa pagsaulog sang Eidl Fitr subong nga tuig sa tunga sang covid-19.
Ini ang ginpahayag ni Sultan Mutalib Sambuto, ang Muslim Affairs Chief sa probinsya sang South Cotabato sa eksklusibo nga interbyu sang Bombo Radyo Koronadal.
Suno kay Sultan Sambuto, igapatigayon sa gihapon ang mga naandan nga tradisyon kada tuig apang sa subong, hugot nga ginaobserba ang mga pagsulondan sang gobyerno agud malikawan ang ginakabalak-an nga covid-19.
May yara man sang pipila nga nagapadulong sa mosque agud magpangamuyo kag magpasalamat kay Allah sa pagtakop sang isa ka bulan nga pagpamalandong.
Sa subong nagapreparar sila para sa sanduli ukon salo-salo matapos ang pag-obserbar sang Ramadan.
Pangamuyo naman sini kay Allah nga mapalayo ang anuman nga katalagman kag magpabilin nga malinong sa tunga sang covid-19 pandemic.
