Patay ang duha ka lalaki matapos ginluthang samtang nagakuha sang ila tagsa ka “banlas” sa sapa sa Sitio Salnaong, Brgy. Datalblao, Columbio, Sultan Kudarat.
Ini ang ginkumpirmar ni Datu Zahir Akmad Mamalinta – Brgy. Datalblao, Columbio, Sultan Kudarat, sa interview snag Bombo Radyo Koronadal.
Ginkilala ang mga biktima sanday alyas El kag alyas Rod, lunsay nga may asawa kag residente sang Tantangan, South Cotabato.
Suno kay Mamalinta, sandig sa imbestigasyon sang Columbio MPS, nagluntad anay ang mainit nga binaisay sa tunga sang mga biktima kag sang suspek antes sila ginluthang, kag nagpalagyo ang suspek sa indi matumod nga direksiyon.
Gintambangan sang mga residente ang pagkuha sang mga lawas sa bukid nga bahin sang Sitio Salnaong sa diin sang marekober ang lawas nga may mga igo sang bala sa nagkalain-lain nga bahin sang lawas.
Gilayon naman sila nga gindangat sa Columbio Infirmary para sa medikal nga atensyon, apang gindeklarar nga dead on arrival.
Sa karon, padayon ang imbestigasyon sang mga otoridad sa gintudlo nga suspek samtang nagapadayon ang hot pursuit operation.
