Duha ka lokal nga terorista ang napatay kag duha pa ang nadakpan matapos mapilasan sa engkwentro batok sa tropa sang gobyerno sa Brgy. Libutan, Mamasapano, Maguindanao del Sur sang Hunyo 22, 2025.
Nagpatigayon sang operasyon ang 6th Infantry Battalion, 33rd Infantry Battalion kag iban pa nga yunit sa idalum sang 601st Infantry Brigade batok sa Dawlah Islamiyah – Hassan Group matapos makabaton sang impormasyon parte sa ila plano nga magtanum sang IEDs sa matawo nga lugar.
Napatay sanday Tahir Salim Suweb kag Benladin Adi Kamid, samtang nadakpan nga pilason sanday Junjun Kayogen Leosen kag Rasul Mendoza Kariman.
Gindala gilayon ang duha sa ospital para sa medikal nga bulig.
Narekober sa lugar ang mga armas, sangkap sang IED, mga cellphone, gamit sa komunikasyon, kag clutch bag nga may mga peke nga ID.
Ginmanduan ni Brig. Gen. Edgar Catu ang tropa nga padayonon ang operasyon batok sa mga nabilin nga miembro. Ginpasidunggan man ni Maj. Gen. Donald Gumiran ang tropa sa madinalag-on nga aksyon kag pagpugong sa plano sang mga terorista.
Padayon ang militar kag kapulisan sa pagbantay kag pagpanugis agud matapos ang banta sang karahasan sa rehiyon.
