KORONADAL CITY- Ginaimbestigaran sa subong sang militar kung kaupod ba sang Bangsamoro Islamic Freedom Fighters ang dalawa ka lawless elements nga napatay sa nahitabo nga shootout sa joint AFP at PNP checkpoint sa parte sang Barangay Elian, Datu Saudi Ampatuan, Maguindanao del Sur. Sa interbyu sang Bombo Radyo Koronadal kay Brigadier General Oriel Pangcog, commander ng 601st Brigade Philipine Army, sakay ang dalawa ka suspek sa isa ka motorsiklo sang na flag down sa checkpoint pero sang gin inspeksyon, bigla na lang nagpadalagan sang motorsiklo ang mga suspek.
Ginbantayan man ang mga ini sa sunod nga checkpoint apang imbis nga mag-untat ini ginpalukpan sang backrider ang mga nakatambay nga nagresulta sa dalawa ka minuto nga buslanay sang lupok, nag-abot ini sa pagkapatay sang mga suspek.
Gilayon naman nga nagresponde ang EOD Team sang Army kag nabawi ang bomba sa posisyon sang mga sini. Ginaimbestigaran pa kung sino ang mga kaupod sang mga napatay nga mga suspek.
Samtang, nakuha naman ang Marine Battalion Landing Team 5 (MBLT5) nga mga armas kag gamit pang gyera sa isa ka abandonado nga balay sa Maguindanao del norte.
Narekober sang mga ini samtang sila nagahiwat sang combat clearing operations sa Barangay Nabalawag, Barira sa sini nga probinsya.
Kaupod sa mga narekober nila ang anom ka rocket-propelled grenade launcher, 19 nga 81mm ammunition, dalawa ka mortar base plate, mga bala sang cal. 50, pila ka mga rifle grenades, pila man sa mga M203 ammunition, isa ka rocket-propelled grenade, kag iban pa nga materyales nga ginagamit sa gyera.
Sa subong, mas ginahugot pa ang pagbantay sang mga sundalo kag pulisya sa Maguindanao lalo na nga lapit na ang Barangay kag Sangguniang Kabataan Election.
