Ginpaidalom na sa state of calamity ang Canlaon City sa Negros Oriental kag La Castellana sa Negros Occidental bangud sang paglupok sang Bulkan Kanlaon.
Suno kay La Castellana Mayor Alme Rhumyla Nicor-Mangilimutan, may yara sang ginabanta 12, 000 ka mga indibidwal nga apektado sang paglupok, magluwas pa sa kahalitan sa pananom kag kasapatan bangud sang ash fall.
Sa Canlaon City, ginpahayag ni Councilor Angel Amador Soliva nga gin-aprubahan nila ang deklarasyon sang state of calamity base sa rekomendasyon sang ila local disaster risk reduction and management council.
Pahayag ni Soliva, 23, 622 nga mga indibidwal nagikan sa mga barangay sang Masulog, Pula, Malaiba, Lumapao, kag Linuthangan ang apektado sang pag-alburuto sang bulkan.
Ginpatuman ang mandatory evacuation pagka-aga pagkatapos nga naglupok ang bulkan kag ginpasiraduhan ang business establishments kag tourism destinations malapit sa Kanlaon Volcano.
Apang suno kay Canlaon Mayor Jose Chubasco Cardenas, may nabaton sia nga report nga may mga mangunguma sa mga barangay sang Masulog, Malaiba, Linothangan, Lumapao, kag Pula nga indi mag-evacuate bangud sa kahangawa nga madula ukon kawaton ang ila kasapatan.
