Malampuson nga na arestar sang T’Boli MPS ang duha ka lalaki sa ginpatigayon nga entrapment operation bangud sa pag akto nga naga pusta sa away sang mga manok ukon sa ginatawag nga ”cockfighting” sa Barangay Basag, T’boli, South Cotabato kahapon nga adlaw sang Biyernes Nobyembre 21, 2025.
Ginkilala ang mga suspek nga sanday kay alias “Erl” (bettor), 44 anyos, lalaki, single, mangunguma kag residente sang Glamang, Polomolok, South Cotabato; kag kay alias “Felipe” (bettor), 48 anyos, lalaki, kasado, mangunguma kag residente sang Barangay Basag, T’boli, South Cotabato. Naaktuhan nga nagapartisipar sa tupada kag nagagamit sang kwarta nga pusta.
Nakuha halin kay alias “Erl” ang pito (7) ka matood nga tag–One Thousand-Peso bills nga lain-lain ang serial numbers (kwarta nga pusta); apat (4) ka tag–napulo ka peso nga sensilyo; anum (6) ka tag–isa ka peso nga sensilyo; isa (1) ka puti nga manok nga pang away; isa (1) ka tari; kag duha (2) ka piraso sang karton nga may signage (“Mayron” kag “Wala”). Samtang, kay alias “Felipe” nakuha ang apat (4) ka matood nga tag–One Thousand-Peso bills nga lain-lain ang serial numbers nga gin gamit bilang pag pamusta.
Sa karon ang mga suspek kag ang mga nakuha nga ebidensya gin padulong sa CIDG RFU 12 Office sa General Santos City para sa dokumentasyon kag husto nga disposisyon.
