KORONADAL CITY- Ginpangguba sang Department of Trade and Industry o DTI South Cotabato ang yara sa P100,000 nga balor sang mga sub-standard products.
Ini ang ginpahayag ni DTI South Cotabato Senior Trade and Industry Development Specialist Elbert Capecio, sa interbyu sang Bombo Radyo Koronadal.
Suno sa iya, lakip sa mga ginpangguba nga mga products amo ang mga mono-block chairs, housewares, steel bars, appliances kasubong sang electric fans, kag LED TV, LED Lamps nga wala sang ICC sticker.
Ginpahayag ni Capecio nga ang nakumpisak sang DTI ang halin suno pa sa pulo ka mga establisyemento sa probinsya.
Kadam an sa mga ini ang nakabayad na sang multa bilang ila man nga penalidad sa pagbayolar sa DTI.
Gindugang pa ni Capecio nga dyutay lamang ang balor sang mga ginpangguba nga mga violative products agud mangin leksyon man sa pipila ka mga negosyante sa lugar.
Isa man suno pa ini ka pamaagi sang DTI ng malikayan nga mabutang sa alanganin ang kabuhi sang mga consumer sa paggamit sang sub-standard nga mga produkto.
