Ginkumpirma ni Loreto Jr. V. Cabaya, ang Regional Director Sang Department Of Social Welfare And Development (Dswd), Sa Interview Sang Bombo Radyo Koronadal nga bawal ang presensya sang politika sa mga aktibidad sang DSWD, ilabi na sa tion sang payout.
Suno sa iya, ginauntat nila ang payout kun may ara sang political activities sa lugar, bilang pagsunod sa mandato nga dapat wala sang pagpakialam sang politika sa pagdistribwer sang ayuda.
Gindugang pa niya nga kun may mga political personalities nga nagapamugos kag indi magsunod sa mga laye, ang DSWD maga-report ini sa Commission on Elections (COMELEC) agud sila masumiter sa posibilidad nga disqualification.
Nagpahayag si Cabaya nga ang DSWD serbisyo para sa tanan, kag indi dapat haluan sang politika. Ila lamang ginahimo ang ila katungdanan agud mahatagan sang husto nga bulig ang mga benepisyaryo, ilabi na gid sa mga kabos kag nagakinahanglan
Ginapasiguro sang ahensya nga patas kag limpyo ang proseso sang pagpanghatag sang ayuda, kag ginapangabay ang kooperasyon sang tanan agud masiguro nga magapadayon ang serbisyo sa katawhan.
