KORONADAL CITY – Igapatawag sang Kongreso ang tanan nga mga regional directors sang Department of Social Welfare and Development (DSWD) agud sabton ang isyu sang pagkadelatar sang paghatag sang social pension sa masobra 1 milyon ka indigent senior citizens sa bug-os nga pungsod.
Sa ekslusibo nga interbyu sang Bombo Radyo Koronadal kay Senior Citizen party-list Rep. Francisco Datol Jr., luyag niya nga pamangkuton ang ini nga mga opisyal ngaa nadelatar ang pension sang mga senior citizens.
Base sa iya ginsang-at nga House Resolution 656, ginduso ni Congressman Datol nga yara sa 1.57 million indigent senior citizens ang wala nakabaton sang social pension sang 2019.
Suno sa kongresista, ang National Senior Citizen Commission na ang magahatag sang pension sa mga indigent senior citizens subong nga tuig.
Nagpaandam man si Datul nga iga-subpoena yadtong mga opisyal nga indi magatambong sa nasambit nga imbestigasyon.
Dugang ni Cong. Datul, magapanabat sa kaso nga graft and corruption ang sin-oman nga opisyal sang DSWD nga nalamita sa sini nga anomalya.
