Ginpasiguro sang Department of Social Welfare and Development (DSWD) nga pagasalaon sang husto ang mga mangin benepisyaryo sang Ayuda Para sa Kapos ang Kita Program (AKAP).
Ang pasalig sang DSWD ang kasunod sang pagkahangawa nga posibli magamit ang amo nga programa agud makakuha sang boto ang pila ka kandidato sa maabot nga 2025 midterm elections.
Nahibaluan nga ang AKAP ang ginakabig last-minute insertion sa 2025 national budget, ang may katuyuan nga mahatagan sang ayuda ang mga minimum wage earners kag near-poor. Mahimo makabaton ang mga benepisyaryo sang P2,000 tubtob P10,000, nga may holdout period nga tubtob tatlo ka bulan.
Suno kay DSWD Secretary Rex Gatchalian, magapakig-angut ang DSWD sa National Economic and Development Authority (NEDA) kag Department of Labor and Employment (DOLE) agud makadihon sang mas maayo nga “standardized targeting system” para sa benepisyaryo sang AKAP.
Pinaagi sa mas ginpaayo nga pagsulondan, mapahagan-hagan ang kahangawa sang publiko angut sa AKAP kag masiguro nga ang nagakadapat lang nga benepisyaryo ang makabaton sang nasambit nga programa.
