Yara na sa kustodiya sang mga otoridad ang isa ka ginakabig nga high value individual matapos makumpiskahan sang droga kag marijuana sa mismo nga puluy-an sini sa banwa sang Arakan, Cotabato, subong nga adlaw sang martes, Agosto 13, 2024.
Suno kay Police Major Jose Ryan Feranil, hepe sang Arakan Municipal Police Station, yara sa listahan sang drug watch list sang mga otoridad ang pangalan sang suspek nga si Alyas Jojo kag madugay na nga gin-surveillance bangud sa iligal nga aktibidad sini.
Kaangot sini gilayon nga ginserbe sang kapulisan ang search warrant sang korte batuk sa puly-an sang suspek kun diin nakuha diri ang isa ka dako nga plastic cellophane sang dried marijuana nga ginabulubanta 10 gramo ang bug-at kag nagakantidad sang Php1,500.
Nakumpiskar man sa suspek ang pito ka kahon sang posporo nga may unod nga ginpalaya nga marijuana nga may kabug-aton nga 5 gramo kag nagakantidad sang Php500.
Nakuha pa sa suspek ang 8 ka plastic sachet sang ginapatihan nga shabu nga may kabug-aton nga 0.5 gramo nga nagakantidad sang Php4,000.
Sa kabug-usan yara sa Php6,000 nga kantidad sang ginadumilian nga droga ang nakuha sa puluy-an sang suspek.
Bangud sini, natalana nga pasakaan sang kaso nga paglapas sa Comprehensive Dangerous Drugs Act of 2002 ang suspek.
