KORONADAL CITY – Ginbawian sang kabuhi ang isa ka driver sang mabunggo ang ginamaneho sini nga pick-up sa poste sang PLDT sa banwa sang Surallah, South Cotabato.
Nagluntad ang aksidente sa Zone 1, Brgy. Libertad, Surallah, South Cotabato pasado alas 9:00 sang gab-i sang Oktubre 3, 2024.
Ginkilala sang kapulisan ang napatay nga si Ryan Salcedo, 42-anyos, may asawa kag residente sang siyudad sang Koronadal.
Sandig sa imbestigasyon sang Suralallah PNP, ginasubay sang salakyan nga ginamaneho ni Salcedo ang dalan sa Brgy. Centrala papuli sa Koronadal sang madulaan sang kontrol kag nabunggo sa poste.
Gilayon pa ini nga gindala sang nagrescue nga mga katapu sang BFP Surallah sa SOCCSKSARGEN General Hospital apang gindeklarar na ini nga dead on arrival sang attending physician.
Sa karon, nagapanawagan ang mga otoridad nga maghalong sa pagmaneho agud malikawan ang anuman nga disgrasya sa dalanon.
