KORONADAL CITY – Gindayaw kag ginpasalamatan sang amay sang isa ka estudyante nga nagbilin sang wallet nga may unod nga dako nga kantidad sang kwarta, ang isa ka driver sang Banga Coop sa banwa sang Banga, South Cotabato.
Ini makaligad nga gin-uli sang driver ang nasambit nga kwarta para kuntani sa tuition fee kag allowance sang iya nga bata.
Sa eksklusibo nga interbyu sang Bombo Radyo Koronadal kay Mike Delos Santos, nagapasalamat ini sa driver sang Banga Coop nga si Alex Magno, 49, nga residente sang siyudad sang Koronadal bangud sa nangin honest ini sa pag-uli sang wallet nga nabilin sa iya ginamaneho nga salakyan.
Suno kay Delos Santos, nakig-pusta pa siya sa iya nga bata nga indi na mabalik ang kwarta nga nabilin apang kumpiyansa daw siya nga maayo nga driver ang nabilinan sini kag wala sila napaslawan.
Kaina sang aga tigayon nga gin-uli ni Alex ang wallet nga kumpleto ang unod nga kwarta nga naglab-ot sa P7,500.00.
Dugang pa sini nga nangin mamag-an ang iya buot nga ibalik ang kwarta bangud nga wala niya ini ginapanag-iyahan.
Sa bahin naman ni Alex, wala siya sang -plano nga kuhaon ang kwarta bangud nahibaluan niya nga iya ini sang iban.
Ginhuna-huna niya suno pa nga indi magkuha sang mga butang nga indi iya labi na ang kwarta nga amo ang igabuhi sini sa iya pamilya.
Kadungan sini, gin-awhag ni Alex ang mga kaupdanan nga driver nga mangin tampad sa tagsa ka adlaw sang ila pangabuhi kag indi magka-interes sa mga butang nga wala nila ginapanag-iyahan.
