KORONADAL CITY- Nagapadayon pa ang imbestigasyon sang Koronadal City PNP makaligad ang nagluntad nga pagpanglabo sang isa ka colorum driver sa isa man ka driver sa Brgy. Zone 3 syudad sang Koronadal.
Ginkilala ang biktima nga si Nonoy Doroteo yara sa legal nga edad kag residente sang Prk. Bagacay, Brgy. GPS, Koronadal City kaupod ang asawa sini kag 4 ka bulan nga bata sang natabo ang insidente.
Ginkilala ang suspek sa pangalan lamang nga Nonoy nga taga Brgy. Saravia, Koronadal City.
Base sa interbyu sang Bombo sa biktima, antes pa ang pagpanglabo nga natabo sa iya, may yara na sila sang away sang suspek bangud sa agaway sa pasahero kun sa diin sadto ginsakit man ini sang suspek apang wala na nagfile sang kaso bangud sa kapigaduhon.
Wala suno pa ini magdahum nga ginadumtan siya sang suspek kun sa diin sa masami nila pagsamalangay sa dalanon ginahagad ini sang suspek nga mag-inaway.
Sang nakit-an siya sang suspek sa may bahin sang City hall gin lagas sila sang suspek nga nagtuga sang trauma man sa asawa sang biktima nga naga uyat pa sang ila lapsag nga bata.
Gin-usar naman sang suspek sa pagpanglabo sa biktima amuh ang samurai kun sa diin nakaangkon ini sang igo sa iya tiil, butkon kag kamot.
Nahibaluan nga natabo ang mismo nga pagpanglabo sa atubang sang waragwagan sang Bombo Radyo Koronadal nga gilayon ginresponderan sang mga trabahante sang DPWH 12 nga mga nagapanglimpyo sa dalanon, mga gwardiya sang istasyon kag mga staff sang Bombo.
