KORONADAL CITY – Ginabulong na subong sa isa ka pribado nga balay bululngan ang drayber sang Toyota Hilux nga nagaduag sang itom makaligad mahulog gikan sa mataas nga bahin sang dalanon nga sakop sang Prk. Hillside, Brgy. Sta Cruz, Koronadal City kag nagtupa sa isa ka puluy-an.
Sa interbyu sang Bombo Radyo Koronadal kay Nelvin Albino, tag-iya sang puluy-an nga natup-an sang nadisgrasya nga salakyan, pasado alas 11 kagab-i samtang sila ang nagakatulog, nakabati sila sang mabaskog nga paglagabong sa guwa sang ila puluy-an kag sang naguwa ang mga ini tuman ang ila kakibot sang makit-an ang salakyan nga nahulog halin sa ibabaw nga bahin sang dalanon.
Gilayon sila nga nagpangayo sang bulig kag gindangat sa balay bululngan ang driver sang nasambit nga salakyan.
Bangud sa pagkahulog sang puluy-an, naguba ang bahin sang pader sang panimalay sang pamilya Albino.
Nagpadulong naman suno pa ang pamilya sang drayber kag nakig-negosyar kun diin nagpromisa sila nga igapakay-o ang damyos nga tuga sang disgrasya mangin ang salakyan nga naigo man sang nahulog nga Hilux .
Naguwa sa imbestigasyon nga nakainom ang drayber sang salakyan rason nga nadisgrasya ini kag naovershoot sa dalanon tubtob nahulog sa puluy-an.
Naghingyo naman ang pamilya sang drayber nga indi na ini pag-hingadlan.
