Ginpanawagan ni Dr. Ruth Estacio, CESO V, bag-o nga Schools Division Superintendent sang Koronadal City, sa tanan nga manunudlo nga mangin mapinasensyahon, mapinalanggaon kag padayon nga giyahan ang ila mga estudyante kasunod sang nagluntad nga shooting insidente sa Ateneo de Zamboanga University Junior High School.
Sa exclusive interview sang Bombo Radyo Koronadal kay Dr. Estacio, iya ginpahayag nga bisan mabudlay kag makapoy ang trabaho sang mga manunudlo, kinahanglan nga indi sila mag-untat sa pagtudlo sang maayo nga pamatasan kag kinaiya sa mga kabataan.
Ginapanawagan man niya sa mga mannunudlo nga padayon nga laygayan kag ipaathag sa mga estudyante ang mga posible nga konsekwensya sang paghimo sang malain nga mga aksyon, lakip na ang mga buhat nga mahimo magresulta sa krimen.
Suno kay Dr. Estacio, importante ang padayon nga paghatag sang husto nga direksyon sa mga kabataan agud mabuligan sila nga makilala ang husto kag sala.
Ginpabutyag niya nga indi lang akademikong kahibalo ang dapat itudlo sa bluthuan, kundi lakip man ang maayo nga pamatasan, responsibilidad kag respeto sa iban.
