Ginkumpirmar sang Department of Public Works and Highways (DPWH) nga sa bahin sang dalanon pakadto sa Lake Sebu padulong sa Maitum ang lugar nga apektado sang landslide nga nagresulta sa pagkaguba sang P93 milyon nga proyekto sang ahensiya.
Suno kay DPWH Sec. Vince Dizon, sa eksklusibo nga interview sang Bombo Radyo Koronadal, plano sang DPWH nga magpatukod sang anum (6) ka kilometro nga bag-o nga ruta agud malikawan ang delikado nga bahin sang dalanon.
Ginpahayag man ni Dizon nga magapadala sila sang eksperto nga geologist agud e-assess ang kahimtangan sang duta kag ang lugar nga plano patukuran sang proyekto.
Suno sa tiglikom, padayon ang pagkatiphag sang duta sa nasambit nga lugar, kabangdanan nga ginakabig ini nga indi luwas kag indi na praktikal kay-uhon ang naguba nga dalanon.
Ginpaathag pa niya nga plano sang ahensiya nga ikonekta ang panibag-o nga ruta sa bahin sang National Highway agud mapahapos ang transportasyon sa rehiyon kag malikawan ang posible nga pareho nga insidente sa palaabuton.
Bangud man nga ang 1.2 kilometro nga sakop sang proyekto ang nagaagi sa kabahin sang lupa nga ginapanag-iyahan sang mga Indigenous Peoples (IPs), nagakinahanglan ini sang husto nga koordinasyon sa National Commission on Indigenous Peoples (NCIP) agud masiguro ang pagsunod sa proseso kag pagrespeto sa katungod sang mga IPs.
Lakip sa nagbisita sa lugar amo si Ferdinand Hernandez, South Cotabato Congressman kag Senior Deputy Speaker, nga nagpahayag sang suporta kag nagpasiguro nga makigkoordinar sa mga plano sang DPWH agud madayon sa mas madasig nga tion ang proyekto kag masaksihan ang aktwal nga sitwasyon sang mga residente.
Dugang pa ni Dizon nga makig-angot man sila sa lokal nga panguluhanon sang South Cotabato sa panguna ni Reynaldo S. Tamayo Jr. agud mapadali ang implementasyon sang konstruksyon.
Ginpasiguro naman sang DPWH nga indi na pag-utron ang amo nga insidente kag himuon ang tanan nga tikang agud malikawan ang liwat nga pagkaguba sang proyekto nga ginpondohan sang nasyonal nga gobyerno.
Plano nga suguran ang panibag-o nga proyekto sa tuig 2026 agud mabalik sa normal ang pagpangabuhi sang mga residente kag mapamaayo ang transportasyon sang mga motorista sa lugar.
