KORONADAL CITY– Nakatalana nga iturnover na sang Bangsamoro Police ang isa ka doktor sa Basilan PNP makaligad nga maarestar ini sang mga otoridad sa banwa sang Parang, Maguindanao.
Sa impormasyon nga ginpalab-ot sang Parang Municipal Police Station, naarestar si Dr. Chao-Tiao New Yumol nga residente sang Lamitan City, Basilan bangud sa kaso nga 26 counts sang paglapas sa cybercrime law.
Ang kaso nga ginapangatubang sang nasambit nga doktor ang paglapas sa Republic Act 10175 o Cybercrime Prevention Act of 2012 bangud sa pagpamuyayaw suno pa sini kag pagpalapnag sang mga pagpangguba pinaagi sa social media.
Nahibaluan nga base man sa monitoring sang militar kag Bangsamoro police, nag-abot si Yumol sa Cotabato City adlaw sang lunes agud magpanago sa Maguindanao apang gilayon naman nga naarestar.
Dugang pa sini nga kinahanglan nga makapyan sang P80,000 sa kada warrant ang nasambit nga doktor ukon masobra P2 million para sa temporaryo sini nga kahilwayan.
