Ginapangabay sang human rights group ang Department of Justice (DOJ) nga magbulig sa International Criminal Court (ICC) agud mapasakaan sang kaso si anay Presidente Rodrigo Duterte sa gin-alegar nga extra judicial killings (EJK) sa giyera kontra droga.
Ginhimo sang gropo ang panawagan matapos nga nagpahayag si Justice Secretary Jesus Crispin Remulla nga gina-estudyohan sang iya ginhimo nga DOJ task force ang posibilidad nga pagpasaka sang kaso batok sa anay Presidente nga may kaangtanan sa paglapas sa International Humanitarian Law, Genocide kag iban pa nga Crimes against humanity.
Suno kay Karapatan secretary general Cristina Palabay, gina-imbestigahan na sang ICC ang EJK nga ginhimo sa Duterte drug war halin sang 2018.
Dugang pa ni Palabay nga ang pagbalewala sa sini nga realidad magapadugay lang sa proseso kag magabuksan lang sa manipulasyon sang kampo sang anay Presidente magluwas pa sa pagpasobra sang pag-antos sang pamilya sang mga biktima nga madugay na nga nagapangita sang hustisya para sa ila mga pamilya.
Suno naman sa human right group, nagalab-ot sa 30,000 ang napatay sa kampanya kontra ilegal nga droga sa idalom sang Duterte administration malayo ini sa datos sang gobyerno nga kapin sa 6,000 ka indibidwal.
