Nag-apela ang Deparment of Health (DOH) sa publiko nga untatan na ang pagpalupok sang firecrackers kag fireworks.
Ini bangud padayon nga naka-record ang DOH sang mga nalukpan bisan nga natapos na ang pagsug-alaw sa New Year.
Ini ang nangin pahayag ni Mr. Arjhon Gangoso- Health Education Promotion Officer III sang Department of Health Region XII sa intreview sang Bombo Radyo Koronadal.
Suno sa ahensya, nagapabilin nga nagapanguna nga biktima sang mga palupok ang mga kabataan ukon menor de edad.
Yara na sa malapit 40 ang bag-o nga kaso sang firework-related injuries nga nalista sang DOH sa bisperas sang New Year samtang siyam ka kaso naman ang nagdugang sang Enero 2, kag 19 ka kaso sa nagligad nga mga inadlaw.
Sa kabilugan, naglab-ot na sa masobra 770 ang numero sang mga kaso sang naigo sang mga palupok sa diin mas mataas ini sang 27.6% kon ikumparar sa nagligad nga tuig.
Sa lista sang DOH, nagapanguna nga rason sang mga injuries ang kwitis, 5-star, kag boga.
Pila sa mga biktima ang nasunog ang panit kag ang mga malala nga kaso amo ang amputation ukon pag-utod sang parte sang lawas.
Nalakip man sa na-record sang DOH ang una nga kumpirmado nga kaso sang naigo sang nagtalang nga bala sa diin isa ka 19 anyos nga lalaki halin sa Davao del Norte ang napatay.
