KORONADAL CITY-Wala pa sang tanto nga sabat sa karun ang Department of Energy, Mindanao field Office kun san-o pa matapos ang tuman nga pagsaka sang presyo sang gatong sa karun para mangin estable na ang presyo sini sa bilog nga Mindanao kag sa bug-os nga pungsod.
Ini ang ginpahayag ni Ms. Rodela Romero ang Assisstant Director sang Department of Energy Oil Industry Management Bureau sa interbyu sang Bombo Radyo Koronadal.
Suno sa iya, indi pa nila matumod sa karun kun san-o pa mag constant ang presyo sang gasolina bangud may deregulation sa subong nga naga luntad sa mga produkto nga petrolyo bangud sa domino effect sang Russia kag Ukraine War sa bahin sang Europa.
Ginhimo sang opisyal ang pahayag makaligad ang anunsyo subong nga adlaw sa pagsaka sang presyo sang petrolyo nga makaapekto ang ini nga pagsaka labi na sa mga drivers kag operators sa bilog nga kalibutan.
Suno pa sa iya, madamo sang dapat nga lantawon sa aspeto sang pagsaka sang presyo sini sa lokal kag international nga aspeto.
Una diri nga maka apekto sa lokal nga presyo sang gatong ukon supply disruption amu ang mga kalamidad nga nagaluntad sa Pilipinas sa diin naga sulod naman ang mga illegal nga pagbaligya sang gasolina nga tuman naman nga pagpatong sa presyo nga padayon man nga gina-monitor sang ila nga talatapan.
Sa tunga sini, ginpasiguro naman sang ila nga talatapan nga husto pa man sang supply sang gatong sa subong sa bilog nga pungsod apang may ara lang sang pagsaka sang presyo sini.
