Ginapanginwalana sang Department of Energy (DOE) ang ginatos nga reklamo nganabaton nila kabangdanan sa mga serye sang dako nga oil price hike.
Suno kay DOE Sec. Sharon Garin, nagadagsa ang mga reklamo nga nakalabot sa ila “Gas Station Concerns” feature sa eGovPH nga ginbuligan sang Department of Information and Communications Technology (DICT).
Ginpahayag niya nga sang nagligad nga semana, antes pa man mag-epekto ang double-digit price hike, nakalabot na sila sang halos 100 nga reklamo.
May mga personnel sang DOE nga mismo ang nagpadulong sa mga gas stations nga gina-reklamo agud magpatigayon sang imbestigasyon, samtang may iban naman nga kaso nga ang mga pulis ang nagbulig sa pag-imbestiga.
Samtang nagapadayon ang imbestigasyon, nagdamo pa ang mga reklamo nga nagapakita sang taas nga presyo sang mga produkto nga indi na angay sa husto nga price range.
Sa tunga sang sini nga semana, naglab-ot na sa 500 nga reklamo nga natanggap sang DOE kag padayon ini nga gina-aksyunan.
Aminado si Garin nga kulang ang manpower sang DOE para mag-abot sa tanan nga lugar nga may gasolinahan nga gina-reklamo.
Bangud sini, nakig-angot na ang DOE sa Department of Trade and Industry kag mga law enforcement agencies agud buligan sila sa pag-verify sang mga reklamo.
Suno kay Garin, ang iban sa mga gas stations nga una nga ginhatagan sang show-cause order nakapadala na sang ila mga pagpaathag.
