Inanunsyo ng Department of Energy (DOE) ang bagong round ng taas-presyo sa mga produktong petrolyo na magkakabisa simula bukas, Marso 24, 2026. Ayon kay Energy Secretary Sharon Garin, tataas ang presyo ng gasolina ng P6.47 kada litro, habang ang presyo ng diesel ay aabot ng P11.88 kada litro. Para sa kerosene, magpapatupad ng P13.66 na dagdag-presyo kada litro.
Bagamat may nakatakdang pagtaas, binigyang-diin ni Garin na bahagyang kumalma ang mga presyo sa pandaigdigang merkado ng langis, na nagdulot ng mas kaunting pagtaas kumpara sa mga nakaraang linggo. Gayunpaman, patuloy ang panawagan ng DOE sa mga kumpanya ng langis na ipatupad ang staggered o unti-unting pagtaas ng presyo upang hindi mabigla ang mga konsumer.
Aminado si Garin na may mga kompanya ng langis na nahihirapan sa pagpapatupad ng ganitong sistema dahil sa mga patuloy na pagbabago sa presyo ng langis, na dulot ng mga tensyon sa Gitnang Silangan. Ayon sa kalihim, ang mga epekto ng mga global na isyung ito ay ramdam sa lokal na merkado.
Samantala, tiniyak ng DOE na sapat pa ang fuel stockpiles hanggang unang linggo ng Mayo, kasabay ng inaasahang pagdating ng mas maraming deliveries ng langis, na maaaring magbigay ng kaunting ginhawa sa presyo sa mga susunod na linggo.
