KORONADAL CITY – Ginpasiguro sang Philippine Army nga pagahimoon nila ang nagakaigo nga mga tikang agud masiguro ang pagpabilin sa kalinong sang pungsod.
Ginpahayag ni Wesmincom spokesperson Major Arvin Encinas nga ginpahugtan pa nila ang ila seguridad sa banwa sang Midsayap, Cotabato makaligad ang nagluntad nga engkwentro nga ginkapatay sang isa ka miyembro sang Bangsamoro Islamic Freedom Fighters kag pagkadakop sang isa nila ka kaupdanan.
Base sa impormasyon, nakaatubang sang mga katapo sang 34th Infantry Battalion ang mga katapo nga ginapatihan nga yara sa idalom sang Bungos Faction sa Brgy. Lumupog.
Narekober sa napatay nga bandido ang AK-47 kag M-16 rifles, mga subersibo nga mga dokumento, mga cellphone kag iban pa nga mga butang.
Sa pihak nga bahin, na-intercept naman sang mga otoridad sa Brgy Olandang sa nasambit man nga banwa ang isa ka pilason nga bandido nga ginkilala kay Maguinale Nawal, isa ka Division commander sa idalom sang Bungos Faction, kag ginapatihan nga napilasan sa nasambit nga engkwentro sa Brgy. Lumupog kaupod ang tatlo nga iban pa.
Nahibaloan nga ang nasambit nga grupo ang ginapatihan nga naulamid sa mga pagpang-harrass kag pagpamomba sa Cotabato.
Gindayaw naman ni 6th ID Philippine Army commander Major General Diosdado Carreon ang mga tropa sa nasambit nga operasyon.
