Bisan wala pa nag-abot sa Pilipinas ang 600,000 ka bakuna kontra sa African Swine Fever (ASF) nga baklon sang gobyerno, ginapreparar na sang Department of Agriculture ang plano para sa distribusyon sini.
Suno sa inisyal nga plano sang ahensya, 10,000 ka AVAC vaccine ang idugang nga ipadala sa Batangas kasunod sang nauna nga roll out sang bakuna.
Ini tanan ginbakal pinaagi sang emergency procurement.
Ginalauman nga mag-abot ang dugang 150,000 ka dose sang bakuna nga kasunod nga adlaw nga plano dal-on sa mga probinsya sang La Union, Mindoro, North Cotabato, Sultan Kudarat, kag Cebu.
Ang iban nga bulto sang bakuna nga kabahin sang 600,000 ka dose nga plano baklon sang gobyerno, pagahatagon sa mga lugar nga una nang ginpili sang DA bilang mga red zone.
Sa karon, may 472 ka barangay ang naapektohan sang ASF halin sa 109 ka mga munisipalidad kag syudad.
Ini halin sa 31 ka probinsya sa bilog nga nasud nga tanan apektado sa red zone, suno sa datos sang Bureau of Animal Industry.
Ang pagbakal sa 600,000 ka dose sang AVAC vaccine ginpondoan sang kabug-usan nga P350 milyon.
