Ginatarget sang Department of the Interior and Local Government (DILG) nga mapatuman ang isa lang ka 911 emergency hotline sa bug-os nga pungsod sa sulod sang anum ka bulan agud mapadasig ang pagresponde sa mga insidente kag malikawan ang paglibog halin sa nagkalain-lain nga hotline numbers sang mga lokal nga panguluhan.
Sang ginaduso nga 2026 budget sang DILG, ginsiling ni Interior Secretary Jonvic Remulla, nga sa karon yara na sa Phase 1 ang implementasyon sang 911 system.
Sa karon, napapatuman na ang 911 emergency hotline sa Metro Manila.
Ipatuman man ang implementasyon sa Cebu, Ilocos, BARMM, Davao, Negros Island Region, Pampanga, kag Region 8.
Suno pa kay Remulla, “dialect-friendly” ang mga 911 call center agud mas mahapos nga maintiendihan kag mabuligan ang mga nagatawag sa oras sang kinahanglanon.
