KORONADAL CITY – Magapatigayon sang imbestigasyon ang Department of Interior and Local Government (DILG) South Cotabato sa aligasyon sang pagpanuhol suno pa sa mga barangay kapitan sa banwa sang Tboli antes ginpatigayon ang eleksiyon sang Liga sang mga Barangay officials.
Ini ang ginpasiguro ni DILG-South Cotabato Provincial Director Audrei De Pedro sa interbyu sang Bombo Radyo Koronadal.
Suno kay De Pedro, kinahanglan nga magsumiter sang formal complaint si Tboli Mayor Dibu Tuan angot sa nasambit nga kontorbersiya kaupod na ang pagdokumento sa dako nga kantidad sang kwarta nga yara sa iya nga custody.
Ang central office suno pa sang DILG ang magahatag sang nagakaigo nga sanction ang Barangay Kapitan nga suno pa nagpanghatag sang kwarta kag posible nga mapahalin sa serbisyo.
Kadungan sini pursigido man si De Pedro nga mahibaluan kun ano ang matuod nga natabo agud nga masampulan ang mga barangay kapitan kag indi na maliwat pa.
Samtang, hugot naman nga ginpanginwala ni Barangay Kapitan Ernesto Manuel sang Barangay Edwards nga siya ang naghatag sang kwarta agud nga magdaug nga ABC President.
