Ginpahibalo ni Department of Information and Communications Technology (DICT) Secretary Henry Aguda ang pila ka mga messaging kag online shopping apps nga posible nga i-ban kon indi nila kwaon ang gambling content.
Suno sa tiglikom, nagahalin na ang pila ka gambling operators kag nagakadto sa mga messaging kag online shopping apps pareho sang Telegram kag Viber, nga posible ginagamit sa ilegal nga sugal online.
Ginpahayag man ni Aguda nga nagabulig na ang Facebook sa pagkuha sang mga gambling pages, samtang ang online shopping app nga Lazada ginkakas na ang tanan nga gambling-related links sa ila platform.
Ang GCash kag Maya naman nakahimo na sang pag-unlink sa mga gambling site.
Base sa datos sang DICT, masobra 8,000 ka gambling sites na ang ila napatanggal, apang may mga bag-o gihapon nga nagausbong.//Padayon ang ila koordinasyon sa mga telecommunication companies (telco) agud masolusyunan ini.
Ginsiguro man sang DICT nga magpagwa sila sang solusyon sa sini nga semana para batukan ang padayon nga pagdamo sang ilegal nga online gambling.
