Ginpasiguro ni Department of Foreign Affairs (DFA) Secretary Enrique Manalo nga yara sa maayo nga kahimtang ang mga Pilipino sa Estados Unidos, bisan pa sa nagpadayon ang ‘mass deportation’ nga gina-implementar sa nasambit nga pungsod.
Suno kay Manalo, bangud sa reputasyon sang ahensya kag sang pungsod , padayon sila nga gapakig-angot sa mga international leaders, kag magapadayon ang maayo nga kahimtang sang mga Pilipino sa US.
Gin pahayag niya ang mga dako nga kontribusyon sang mga Overseas Filipino Workers (OFWs) nga nagatrabaho sa mga health care facilities, banking, hotel services, kag management sa nasambit nga pungsod.
Samtang ginpahayag ni Manalo nga bukas kag andam maghatag sang bulig ang embahada sang Pilipinas sa US kung may magakinahanglan sang assistance o bulig halin sa gobyerno sang Pilipinas.
Matandaan man nga 24 ka Pilipino ang una nga ginpadeport sang Estados Unidos tungod sa pagkasangkot sini sa mga paglapas sa layi.
Ginpasiguro man ni Manalo nga magapadayon ang pakig-alyansa sang Pilipinas sa World Health Organization (WHO), bilang isa ini sa mga una nga prayoridad sang pungsod, kag wala ini sing pagbag-o.
