DFA, ginkumpirma nga isa ka Pilipino ang napatay sa Myanmar

Ginkumpirma sang Department of Foreign Affairs nga nasapwan ang isa ka patay nga overseas Filipino nga una na nabalita nga missing matapos nagluntad ang magnitude 7.7 nga linog sa pungsod Myanmar.

Ginpahayag ni DFA Undersecretary Eduardo De Vega nga ang biktima ang ginkilala kay Francis Aragon.

Suno sa ahensya, napahibalo na sa pamilya sang nasambit nga Pilipino ang nahitabo kag ang sitwasyon sini sa karon.

Bilang pagrespeto sa pamilya sini, indi anay sila magapagwas sang impormasyon angot sa nasambit nga Pinoy.

Ginpasiguro man sang DFA nga magapadayon ang ila nga pagpangita sa mga Pilipino nga missing sa giyapon matapos ang makusog nga pagtay-og sang lupa.