Isa sa mga nakapasar sa April 2025 Civil Engineering Licensure Examination, si Jonne Mikael Balquin, ang nagpa lab-ot sang madalom nga pagpasalamat sa scholarship nga iya nabaton, ilabi na sa dako nga bulig sini sa pagbayad sang iya tuition fee.
Sa interbyu sang Bombo Radyo Koronadal, ginpahayag ni Balquin ang iya pagpasalamat sa UniFAST scholarship program bangud ini ang nagtuga sang daku nga oportunidad agud makab-ot niya ang iya handom nga mangin engineer.
Suno sa iya, ang scholarship daku nga nabulig sa pagpadayon niya sa pageskwela bisan pa sa kabudlay sang bayranon.
Gindugang pa ni Balquin nga ang determinasyon kag inspirasyon nga naghalin sa iya kaugalingon amo ang nagpabakod sa iya sa tunga sang mga pagsulay. Ginkilala man niya ang suporta kag pagpalangga sang iya pamilya kag mga abyan nga padayon nga nagbulig kag nagtindog kaupod niya.
Ginpanawagan man ni Balquin sa tanan nga indi magduha-duha sa ila kaugalingon.
Suno sa iya, nga kon may handom ka, pagsalig sa imo kaugalingon ang dapat agud makab-ot mo ini.
