KORONADAL CITY – Malipayon ang ginpakigbahin sang magnobyo nga suldado ang ila nga love story sa Bombohanay Bigtime kadungan sang selebrasyon sang Valentine’s day matapos nga nangin topiko ang pinasahi nga wedding proposal samtang yara sa operasyon batuk sa mga rebelde nga NPA sa Sultan Kudarat.
Sa eksklusibo nga interbyu sang Bombo Radyo Koronadak kay Cpl. Denemar Albani, ginpahayag sini nga ginbuligan siya sang iya nga mga kaupdanan nga madayon ang wedding proposal samtang nagapahuway sila sa patrol base sa tunga sang kagulangan sa Bagumbayan.
Aminado si Albani nga ginkulbaan siya sa ginhimo nga proposal kag mismo nga ang ila nga Batallion Commander nga si Lt. Col. Harold Cabunoc sang 33rd IB Makabayan Batallion ang kaupod sa nagplano.
Apang, dako ang pasalamat sini kag matam-is nga huo ang sabat sang iya nga nobya.
Suno naman kay Pvt. Christine Porcadilla, wala niya ginalayman nga mangin kasubong kasadya ang ila nga love story bangud sa nag-effort ang nobya sini.
Tanan nga kakapoy ang nadula kag indi niya mapaathag ang kalipay tubtob sa subong.
Dako naman ang pagpati ni Porcadilla nga destiny ang naglapit sa ila ni Albani bangud 2014 pa sila naghangpanay kag sang nagsulod na siya sa serbisyo bilang suldado nagkitaay sila kag nagbalikay.
Kaangot sini, gintalana naman sa Abril 20, 2018 ang kasal sang duha sa isa ka simbahan sa Esperanza, Sultan Kudarat.
Nahibaluan nga 8 ka tuig na sa serbisyo bilang Radioman si Albani samtang 1 taon pa lamang bilang medic si Porcadilla.
Madumduman nga pareho nga nag-atubang na sa serye sang engkwentro kontra sa mga BIFF, NPA kag Drug syndicates sanday Porcadilla kag Albani.
