KORONADAL CITY- Hustisya sa gihapon ang ginasinggitan sang pamilya sang anay Deputy chief of police sang Polomolok PNP nga si Police Senior Inspector Hernan Gabat makalgad ini nga ginluthang patay sa banwa sang Polomolok sang nakaligad nga bulan.
Gintambungan ang pagdul-ong sa ulihi nga palahuwayan sang nasambit nga police officer sang iya mga pinalangga sa kabuhi, mga kaupdanan sa trabaho kag mga kakilala kag mga abyan sa Tantangan South Cotabato.
Tuman naman ang pagpangasubo nga nabatyagan sang iya pamilya ilabi na sang iya asawa nga si Gng. Luz Gabat kag nabilin nga mga bata kag ginhikanan.
Sa subong may yara na sang ginhimo nga task force ang PNP 12 kag South Cotabato PNP nga magatutok sa madalom nga imbestigasyon sa pagpangluthang patay sa Deputy Chief of Police sang Polomolok PNP nga si PSI Gabat.
Sa ekslusibo nga interbyu sang Bombo Radyo Koronadal kay Police Superintendent Romeo Galgo tagpamaba sang PRO 12 nga isa lang si PSI Gabat sa madamo nga mga katapo sang PNP nga ginpatay sang mga kriminal ilabi na nga aktibo ini sa pagtapna sang iligal nga droga.
Suno naman kay South Cotabato Police Provincial Director Senior Superintendent Franklin Alvero, may yara na sila sang mga suspek nga pagapasakaan sang kaso kag iban pa nga mga personalidad nga may koneksyon sa nasambit nga krimen.
