KORONADAL CITY- Nanindugan ang Department of Education 12 nga wala sila sang nahibaluan nga nakasulod sa rehiyon kag may nabakunahan nga mga estudyante sang dengue vaccine nga dengvaxia.
Ini ang ginkumparar ni DepEd 12 Information Officer Antonio Maganto Jr. sa interbyu sang Bombo Radyo Koronadal matapos nga isa ka iloy ang nagpalab-ot sang impormasyon sa waragwagan nga kalakip ang bata sini sa halos 600 nga ginbakunahan sa Telafas National Highschool tuig 2016.
Apang suno kay Maganto, wala sang estudyante ang ginbakunahan sang dengvaxia sa rehiyon 12 bangud indi nangin benepisyaryo ang Region 12 sang nasambit nga bakuna.
Kaangot sini, nagpanawagan ang opisyal sa Bombo Radyo Koronadal sa tanan nga ginikanan nga kun may nahibaluan nga nabakunahan sang dengvaxia gilayon ipahibalo sa DepEd 12 agud gilayon maimbestigahan.
Samtang ginpasiguro naman sini nga aksyunan sang ahensya ang nareport nga dengue vaccine ang ginbakuna sa mga estudyante sang Telafas National Highschool nga ginasiling nga may naospital bangud sa balatian nga dengue.
