Ginpasiguro sang Department of Trade and Industry (DTI) nga wala sang ginapaabot nga pagsaka sang presyo sang mga basic kag prime commodities, sa tunga sang posible nga pagsaka sang presyo sang gatong bangud sang nagabaskog nga tensyon sa tunga sang Estados Unidos kag Iran.
Suno kay DTI Secretary Cristina Roque, wala pa sang may nagpasaka nga petisyon halin sa mga manufacturers para sa price adjustment, gani wala sang basehan para magsaka ang presyo sang mga balaklon sa sini nga tion.
Dugang pa sini, mas maayo nga hulaton anay ang sunod nga developments antes maghimo sang mga espekulasyon.
Madumduman nga sang una nga nagumpisa ang tensyon sa tunga sang Iran kag U.S., nagsaka ang presyo sang gatong bangud sang mga pag-atake kag pagsira sang Strait of Hormuz, nga nakaapekto man sa transportasyon sang mga produkto kag nagpatuga sang kabalaka sa posible nga pagsaka sang presyo sang mga balaklon.
