Ginpahayag sang Department of Foreign Affairs (DFA) nga hugot nga ginatutukan ang kahimtangan sang mga Pilipino sa Iran sa tunga sang nagalala nga kinagamo sa pungsod bangud sa paghinay sang ekonomiya.
Suno sa DFA, ginbulubanta 800 ka mga Pilipino ang kasamtangan nga nagatinir kag naga-obra sa Iran, kun sa diin nag-umpisa ang mga protesta sa kabisera sang Tehran sang Domingo.
Gintunaan sang kinagamo ang malapnagon nga paghublag-protesta sang mga shopkeeper sa Tehran bilang pagdumili sa nagataas nga presyo sang mga baraklon kag economic stagnation.
Ginpasigurado man sang DFA nga sa kasamtangan wala pa sang Pilipino nga apektado sang mga protesta.
Samtang, nagpaalinton man ang ahensiya sa mga Pilipino nga maglikaw sa mga lugar nga apektado sang hublag-protesta kag gilayon nga makig-angot sa ila talatapan kun nagakinahanglan.
