KORONADAL CITY – Patay sa nagluntad nga shootout ang isa ka empleyado sang Department of Environment and Natural Resources (DENR) sa nagluntad nga buy bust operation sa siyudad sang Koronadal.
Ginkilala ang suspek nga si Aman Ben Abdulmajid Goling alyas ‘Salman’, yara sa husto nga edad, may asawa, empleyado sang nasambit nga ahensiya kag residente sang Brgy. Sta. Cruz, Koronadal City.
Batay sa imbestigasyon, nakahibalo ini nga isa ka pulis ang iya ka-transaksyon samtang sakay ini sa iya Toyota Fortuner nga salakyan kag ginpadalagan pakadto sa Brgy. Morales nitong lungsod.
Apang gilayon ini nga na-corner sang gintingob nga pwersa sang Provincilal Police Drug Enforcement Unit kag Koronadal City Police Drug Enforcement Unit sa bahin sang South Cotabato Electric Cooperative (Socoteco-1) rason nga nagpanaog ini sa salakyan kag ginhana nga luthangon ang mga otoridad apang nag-jam ang iya armas, rason nga ginpalukpan siya sang mga ini.
Narekober sa crime scene ang medium sachet sang shabu, drug paraphernalia, ang iya salakyan, kalibre 38 nga revolver kag mga bala sini.
Gindangat pa sa South Cotabato Provincial Hospital ang suspek apang gindeklarar nga dead on arrival.
