KORONADAL CITY – Apat ang pilason matapos nga gin-arado sang isa ka dump truck ang tatlo ka salakyan sa Alunan Avenue, Koronadal City pasado alas 2 subong nga hapon.
Nagluntad ang nasambit nga aksidente sa atubangan sang South Cotabato Provincial Capitol malapit sa bahin sang NDMU Complex.
Base sa inisyal nga imbestigasyon sang Koronadal City Traffic Section, lunsay halin sa Upper Valley area ang nasambit nga mga salakyan sang madulaan sang kontrol ang dump truck kag ginbungguan ang likod nga bahin sang Denver Spring Water Resources, tubtob nabungguan naman ang isa ka Isuzu Ekf kag nadalahig man ang isa ka tricycle.
Ginpahayag sang pila ka mga testigo nga samtang panaog sila padulong sa downtown area, nagabusina na ang dump truck agud mapaandaman ang iban nga mga motorista.
Ginkilala ang pila sa mga biktima nga sanday Rio Menido, 29 anyos kag residente sang Upper Mabuhay, Brgy Topland; kag si Reymond Poloyapoy, 20 anyos kag residente sang Brgy San Isidro, Tupi, South Cotabato.
Samtang ang iban naman ang gindangat kag nagapaayo na sa pribado nga ospital.
Suno kay City Traffic Management Office head Raul Miramon, nagbakal lamang siya sang bulong sa isa ka botika sang nabatian niya ang mabaskog nga paglupok sang isa ka ligid.
Madasig suno pa ang dalagan sang truck kag ginlaragway niya ang iya nabatian nga daw isa ka bomba nga nagsigabong.
Nadalahig man sa nasambit nga aksidente ang isa ka tricycle nga may MTOP number 1986.
Padayon ang imbestigasyon sa nasambit nga aksidente.
Monitor to Bombo Radyo Koronadal for additional details.
