Gilayon nga nag-mobilize ang gobyerno sang Pilipinas sang humanitarian aid agud magbulig sa Myanmar matapos ini makaeksperyensya sang 7.7 magnitude nga linog nga nagresulta sa pagkapatay sang masobra 1,000 ka indibidwal.
Sa isa ka pahayag, ginmando sang Office of Civil Defense (OCD) ang pagtigayon sang critical interagency meeting agud i-coordinate ang pagbulig sang Pilipinas kag maghatag sang kinahanglan nga suporta para sa mga apektado nga biktima.
Naka-standby naman ang Philippine Emergency Medical Assistance Team (PEMAT) halin sa Department of Health, nga may kabug-usan nga 31 ka personahe.
Dugang pa, isa ka light Urban Search and Rescue (USAR) team ang ginporma nga nagalakip sang Bureau of Fire Protection (BFP), Armed Forces of the Philippines (AFP), Metropolitan Manila Development Authority (MMDA), kag Apex Mining Corporation/First Gen-Energy Development Corporation (EDC) SRR Teams, nga may kabug-usan nga 80 ka personahe.
Bangud sini, naglab-ot na sa 114 ang kabug-usan nga numero sang mga personnel nga nagapadala sang bulig, lakip na ang duha ka personahe halin sa Office of Civil Defense kag si Contingent Commander LTC Erwin Diploma sang Philippine Air Force.
Sa pihak sini, tatlo pa ka dugang nga miyembro sang ASEAN Emergency Response and Assessment Team (ASEAN-ERAT) ang ginpangayo sang ASEAN Coordinating Center for Humanitarian Assistance (AHA) nga magbiyahe padulong Myanmar antes ukon sa adlaw sang Marso 30, 2025.
Samtang, nagpadala naman sang mensahe sang simpatiya kag pakikiramay si Defense Secretary kag National Disaster Risk Reduction and Management Council Chairman, Gilberto Teodoro, Jr.
