Patay na sang nadangat sa balay bululngan ang 27-anyos nga lalaki matapos ginbuno sang isa ka hubog nga mangunguma sa bahin sang Barangay Improgo, Banga, South Cotabato.
Ginkilala ang biktima si alias nga “Joker”, wala sang trabaho, residente sang Brgy. Lambontong, Surallah, South Cotabato, samtang ang suspek ang ginkilala sa alisa “Don-don”, 43-anyos, single, kag residente sang Brgy. El Nonok, Banga.
Base sa report sang Banga Municipal Police Station (MPS), base naman sa nakakita, magkaupod sila sang biktima kag sang ila mga abyan sa terrace sang panimalay ni Gina Hitoriaga sang nag-abot ang suspek nga yara sa impluwensya sang makahulubog nga ilimnon.
Ginbati suno pa sang biktima ang suspek sang “maayong gab-i” apang ginsabat ini sang suspek nga “bun-on taka ker” nga ginkakibot man nila kag ini na ang tion nga ginbuno sang suspek ang biktima gamit ang isa ka kusilyo.
Matapos ang krimen madasig man nga nakapalagyo ang suspek sa indi pa mahibal-an nga direksyon, samtang ang biktima ang dason gindala sa balay bululngan apang gindeklara nga dead on arrival sang mga doctor.
Suno sa impormasyon, ang nasambit nga suspek ang anay naimbolbar sa kaso angot sa illegal nga droga sa idalom sang RA 9165 ukon ang Comprehensive Dangerous Drugs Act o 2002 kag pila ka beses na man naimbolbar ini sa insidente sang pagpangbuno sa pipila ka mga lugar.
Sa karon padayon ang ginahimo nga imbestisayon sang kapulisan sa agud mahibal-an ang lokasyon kag motibo sang suspek sa nasambit nga krimen.
