KORONADAL CITY – Nagsaka pa sa kabug-usan ang damyos sa sektor sang agrikultura sa Tulunan, North Cotabato base sa pinakaulihi nga damage assessment report sang Municipal Agriculture Office sa nasambit nga banwa.
Suno sa report sang MAO, yara sa masobra P183 million ang damyos sa humay, halos P300,000 sa mga maisan kag masobra naman sa P120,000 ang naguba sa mga banana plantation.
Nahibaluan nga yara sa 15 ka mga barangay sa banwa ang lubos nga apektado ang mga tanum nga humay bangud sa pag-igo sang mabaskog nga ulan, 9 ka mga barangay ang may tanum sang saging nga apektado samtang isa ka barangay ang may damyos sa talamnan sang mga mais.
Sa pinakaulihi nga damage report , yara naman sa 1,616 ka mga mangunguma sa banwa ang apektado.
Kaangot sini, nagsinapol na ang Local Disaster Risk Reduction and Management Council agud nga irekomendar ang pagdeklarar sang state of calamity sa bug-os nga Tulunan kun basehan ang deklarasyon sang 30% damage sa kabug-usan nga mga produkto nga pang agrikultura.
Ginpahayag naman ni PDRRMO Chief of Operations Arnulfo Villaruz nga yara sa masobra 40 porsyento sang mga tanum nga humay, mais kag sagingan sa banwa ang apektado matapos magpanalasa ang kalamidad.
