KORONADAL CITY – Nagapadayon sa karon ang imbestigasyon sang Koronadal City PNP angot sa nagluntad nga panibag-o nga insidente sang paghikog sa Brgy San Isidro.
Sa interbyu sang Bombo Radyo Koronadal kay Brgy San Isidro, Koronadal City Kapitan Lloyd Gabutin, ginpahayag sini nga naghikog si Alyas Maricar, 21-anyos kag residente sang Mati, Davao City nga kasamtangan nga nagatinir sa Prk Mabinuligon sa nasambit nga barangay.
Suno kay Kapitan Gabutin kag base sa iya nga pagpakighinun-ahon sa mga tawo sa lugar, tuman nga selos ang isa sa mga motibo nga ginatan-aw angot sa pag-utas sini sang kaugalingon nga kabuhi usar ang 1 ka habol.
Ini bangud, nagtambong suno pa sa isa ka bunyag ang live-in partner sang biktima nga ginkilala kay Billy Joe alyas “Badi” Delo Santos, 25-anyos kag residente sang nasambit nga barangay.
Diri suno pa nagkitaay si Delo Santos kag anay girlfriend sini.
Ini sa karon ang isa sa mga ginatan-aw nga motibo sang biktima sa iya nga pagsuicide.
Nahibaluan nga halso 2 pa lang kabulan nga naga-upod ang mga ini.
