KORONADAL CITY– Nagapadayon pa sa karon ang imbestigasyon sang Esperanza Municipal Police Station kaangot sa nasapwan nga bangkay sang babaye nga ginapatihan nga ginlugos kag brutal nga ginpatay.
Sa impormasyon nga ginpalab-ot sang Esperanza PNP, nasapwan ang bangkay sang babaye nga ginabulubanta nga yara sa 17-19 anyos ang edad nga wala pa natumod ang identity sa isa ka African plantation sa Prk. Samadinalag-on, Brgy. Daladap, Esperanza Sultan Kudarat.
Brutal ang pagpatay sa dalaga bangud gintabunan ang bibig sini kag may igo man sang bala sa dughan kag iban nga bahin sang lawas.
Isa ka sinyales nga ginlugos ini ang bangud nakapanaog ang pantalon kag underwear sang biktima samtang halos nauba naman ang ibabaw nga bayo sini nga stripe pink.
Sa karun indi pa mahibaluan kun sin-o ang biktima bangud wala sang himata ang nag claim sa bangkay sini kag wala man sang nakakilala sa dalaga.
Ginapangita naman sa karon ang posible nga may kahimuan sang krimen.
