DA, ginpasiguro nga bastante ang suplay sang agri products tubtob bulan sang Hunyo

Ginpahayag sang Department of Agriculture (DA) nga bastante ang suplay sang agricultural products sa pungsod sa masunod nga 90 ka adlaw ukon tubtob Hunyo, bisan pa sang tensyon sa Middle East kag pagsaka sang presyo sang petrolyo.

Suno kay Agriculture Secretary Francisco Laurel Jr., wala sang problema sa suplay sang mga nagapanguna nga balaklon lakip na ang bugas, kag ginapaabot nga magpabilin ini nga stable tubtob Hulyo.

Ginpaathag sang kalihim nga madamo sang stocks sang bugas sa National Food Authority (NFA) kag nagasugod man ang peak harvest tubtob Mayo.

Samtang, padayon nga stable ang suplay sang iban nga produkto kasubong sang mais, kalamay, sibuyas, gulay, kag karne nga baboy bangud sa nagapadayon nga produksyon kag imported stocks.