Mahimo nga may negatibo nga impact sa subong ang panibag-o nga mandato sang Department of Agriculture (DA) nga ipa-auction ang mga old stocks nga bugas sa bodega sang National Food Authority (NFA), bangud mahimo nga mangin limitado lamang ang mga personalidad nga maka-access sa bidding kag mahimo nga magkadto lamang ini sa mga traders nga masami naga-hoard sang supply sang bugas sa pungsod.
Ini ang panan-awan ni Mr. Leo Fuentes, Masipag Mindanao Coordinator, sa interview sang Bombo Radyo Koronadal.
Suno sa iya, maayo man nga inisyatibo ang nasambit nga tikang, apang mahimo gihapon ini madayaan sang pila ka mga traders nga mag-manipula sang stocks, kag mangin disadvantage sa mga mangunguma.
Dugang pa sini, isa ka dako nga hangkat sa subong nga ginatubang sang National Food Authority (NFA) ang epektibo nga pagpatuman sang distribusyon sang mga daan nga bugas nga nakatambak sa ila bodega, agud nga ma-refill ini sa tion sang harvest season sang mga mangunguma, nga isa ka madugay na nga problema sa Pilipinas.
Madumduman nga ipaidalom sa bidding sang NFA ang aging rice stocks, ukon mga bugas nga nagatambak sa bodega, bilang preparasyon sa harvest season.
Suno kay Department of Agriculture (DA) Sec. Francisco Tiu Laurel Jr., kinahanglan na nga mangin maligwa ang ila mga bodega agud may lugar para sa mga bag-o nga tubas nga humay. Magabakal sang bag-o nga stocks ang DA halin Marso ukon Abril.
Samtang nagpang-imbitar na ang NFA para sa bidding sang masobra 700,000 ka sako sang aging rice nga nagabalor sang ₱900 million.
