Nagapangayo ang Department of Agriculture (DA) sang P250 bilyon nga pondo para sa 2027 agud mapabaskog ang food security, mapauswag ang pangabuhi sang mga mangunguma kag manugpangisda, kag mapalig-on ang ekonomiya sang pungsod.
Ginpahayag ni Agriculture Secretary Francisco Tiu Laurel Jr. nga nagpanubo ang kontribusyon sang sektor sang agrikultura sa gross domestic product (GDP) halin sa 19 porsyento sang 2005 pakadto sa 7.9 porsyento makaligad ang duha ka dekada, bangud sang madugay nga kakulangan sa pamuhunan sa sektor.
Suno sa secretary, ang ginapangayo nga budget mas mataas kaysa sa P215 bilyon nga pondo sang 2026 kag halos doble kumpara sa P117 bilyon nga gin-aprubahan sang 2022.
Ginpahayag niya nga ang pondo pagagamiton sa farm mechanization, irigasyon, research, cold-chain facilities, digital infrastructure, kag post-harvest systems agud mapataas ang produksyon kag mapanubo ang presyo sang pagkaon.
