-- ADVERTISEMENT --
Gina-pamonitor sang Department of Agriculture (DA) sa mga hog raiser ang paglapta sang African Swine Fever (ASF) subong nga asod asod ang mga pag-ululan.
Suno kay Dr. Conastante Palabrica, Assistant Secretary for Swine and Poultry sang DA, madasig maglapta ang ASF sa panahon sang tag-ululan, base sa record sang ahensiya halin sang una nga nadetect ang virus sa Pilipinas.
Suno sa opisyal, kalimitan naga-umpisa ang pagdamo sang kaso sang ASF sa Agusto tubtob Setyembre kon san-o wala untat ang mga pag-ululan sa madamo nga bahin sang pungsod.
Kon tag-init naman, nagapanubo ang kaso.
Paathag ni Palabrica, ang virus nagakalat sa mga baboy sa panahon sang tag-ulan kag pagbaha, gani madali ini makaabot sa mga kulungan nila.
