Ginabantayan sang Department of Agriculture (DA) ang presyo sang mga lokal nga prutas nga mabaligya sa pagsugata sang Bag-ong Tuig.
Suno sa DA Agribusiness and Marketing Assistance Service (AMAS), ang mga prutas nga ila ginamonitor amo ang melon, pakwan, pomelo, avocado, mango kag papaya.
Base sa ila monitoring, ang presyo sang pakwan halin sa P60 tubtob P90 kada kilo samtang ang pomelo halin sa P80 tubtob P250 kada kilo; ang melon naman halin sa P60 tubtob P140 kada kilo, avocado halin sa P300 tubtob P600 kada kilo; ang manga halin sa P150 tubtob P300 kada kilo kag ang papaya halin sa P60 tubtob P90 kada kilo.
Ginapaabot sang DA nga magataas pa ang presyo sang mga prutas sa sulod sang pila ka adlaw antes sang Bag-ong Tuig, sa diin tradisyon ang pagpreparar sang 12 ka bilog nga prutas sa lamesa.
