KORONADAL CITY – Epektibo na humalin sang nagligad nga gab-i ang pagpatuman sang curfew sa bug-os nga probinsya sang Sultan Kudarat pagkatapos sang deklarasyon ng Martial Law.
Ini ang ginpahayag ni PNP Provincial Director Pol. Senior Supt. Raul Supiter sang probinsya sang Sultan Kudarat sa eksklusibo nga interbyu sang Bombo Radyo Koronadal.
Ginpahayag sini nga hugot nga ginapatuman ang nasambit nga curfew humalin alas-10:00 sang gabi tubtob alas-4:00 sang kaagahon.
Suno pa kay Supiter, kun wala sang mga importante nga transaksiyon, indi na lamang anay maguwa sa puluy-an kag magpauli sang mas temprano bag-o mag-abot ang natalana nga oras sang curfew.
Dugang pa sini nga may yara sang magaronda nga mga pulis agud nga siguraduhon ang kaluwasan sang mga pumuluyo.
Samtang, ginsulod sang mga otoridad ang mga bars kag pila pa ka mga night spots sa lugar agud nga pahanumduman ang mga nagapanag-iya nga magsirado sang temprano.
Ginpapauli man ang mga customers sa pila ka mga bars kun diin ginpasalamatan sang mga ini ang mga otoridad bangud sa pagprotehir sa ila.
Nagpanawagan man si Supiter sa tanan nga mga pumuluyo nga magkooperar sa gobyerno para man sa kaluwasan sang tanan.
