Gin-agwanta sang mga crew sang BRP Teresa Magbanua (MRRV-9701) ang kagutom kag kauhaw bangud sa sulod sang pila ka semana matapos nga ginbalabagan sang Chinese forces ang resupply missions sa Philippine Coast Guard ship nga nagabantay sa Sabina Shoal.
Masobra sa 60 ka crew members sang barko ang nagabantay sa Escoda Shoal sa West Philippine Sea ang naga-agwanta sang lugaw sa sulod sang tatlo ka semana.
May yara man sang tion nga nagatulog na lang ang mga ini agud nga malipatan ang tuman nga kagutom.
Apisar nga maka-filter sila sang tubig dagat pinaagi sa freshwater generator, nasalod man sila sang tubig sa ulan kag naga-inom sang tubig nagikan sa air conditioning unit sang barko.
Ang iban nga supply ang gin-airdrop sang Agosto 28 apang indi ini bastante para sa tanan nga sakay.
Ini lang ang tion nga nakabaton sang supply ang Magbanua matapos ang mandu nga magtinir sa lugar sang Abril.
Bangud sang limitado nga suplay kag sa mga natabo sa lima ka bulan nga deployment, apat ka myembro ang nakabatyag sang gastroenteritis, dehydration kag gout.
Magluwas diri, ang seguridad sang crew sang BRP Teresa Magbanua ang nabutang sa alang-alang matapos nga ginbunggu-an sang China Coast Guard ship ang barko sang Agosto 31.
Isa sa mga naguba nga portion amo ang malapit sa engine room.
Sang Domingo, nagbiya sa Escoda Shoal ang BRP Teresa Magbanua.
Apang ginpasiguro sang Philippine Coast Guard nga naintindihan nila ang sitwasyon sang mga crew.
